Լոնդոնի «Արսենալը» պաշտոնական առաջարկ է արել կատալոնական «Բարսելոնային» Չիլիի հավաքականի հարձակվող Ալեքսիս Սանչեսի տրանսֆերի վերաբերյալ, հաղորդում է Goal.com-ը։

Անգլիական ակումբը 25-ամյա ֆուտբոլիստի համար պատրաստ է վճարել 40 միլիոն եվրո։ Լոնդոնցիների գլխավոր մարզիչ Արսեն Վենգերը Սանչեսին դիտարկում է որպես ամառային տրանսֆերային պատուհանի գլխավոր նպատակ։ Առաջիկայում ֆրանսիացի մասնագետը կհանդիպի ֆուտբոլիստի գործակալի հետ՝ քննարկելու անձնական պայմանագրի կետերը։

Հաղորդվում է, որ այդ գումարը բավարարում է կատալոնական ակումբին, որը մտադիր է այն օգտագործել թիմն ուժեղացնելու համար։