Բրազիլիայի հավաքականի հարձակվող Նեյմարը կլորիկ գումար է ծախսել իր հայրենիքում ընթացող ֆուտբոլի աշխարհի առաջնության հանդիպումների տոմսերի վրա, հայտնում են տեղի լրատվամիջոցները։

Մասնավորապես, նշվում է, որ «Բարսելոնայի» բրազիլացի հարձակվողն իր մտերիմների ու ազգականների համար տոմս ձեռք բերելու վրա ծախսել է 170 հազար դոլար։

Նշենք, որ Բրազիլիայի ընտրանու յուրաքանչյուր ֆուտբոլիստի 15 անվճար տոմս է հասնում, սակայն դա չի բավականացրել Նեյմարին, ով տոմսեր է գնել իրենց հավաքականի մասնակցությամբ խմբային փուլի բոլոր մրցավեճերի, ինչպես նաև քառորդ եզրափակչի ու կիսաեզրափակիչ ու եզրափակիչ դիմակայությունների համար։

Իր հոր համար, որը նաև ֆուտբոլիստի գործակալն է, աշխարհի հնգակի չեմպիոնների ներկայիս առաջատարը տոմս է գնել պատվավոր հյուրերի համար նախատեսված օթյակում։

Բացի այդ, Նեյմարը վճարել է նաև իր ընկերուհի Բրունա Մարկեզինիի հարազատներին և մտերիմներին տրվող տոմսերի համար։